ئه‌فسه‌رێكی پێشمه‌رگه‌ ئۆتۆمبێلی وه‌زاره‌ت بۆ كاروباری تایبه‌تی به‌كارده‌هێنێت

پاڵاوگەکەو ئۆتۆمبێلەکەی وەزارەتی پێشمەرگە

خه‌ندان- هه‌ڤاڵ محه‌مه‌د

ئه‌فسه‌رێكی پێشمه‌رگه‌ به‌پله‌ی‌ عه‌قید، به‌پێچه‌وانه‌ی‌ بڕیاری حكومه‌ت، ئۆتۆمبێلی وه‌زاره‌ت بۆ راییكردنی كاروباره‌ تایبه‌تییه‌كانی به‌كارده‌هێنێت، ئه‌وه‌ش بۆ كاركردن له‌پاڵاوگه‌یه‌كی نایاساییدا كه‌خۆی خاوه‌ندارێتی ده‌كات‌و زه‌وییه‌كه‌شی موڵكی شاره‌وانییه‌، وه‌زاره‌تی پێشمه‌رگه‌ش به‌ڵێنی به‌دواداچوون ده‌دات.

ئه‌و ئه‌فسه‌ره‌ كه‌ناوه‌كه‌ی‌ لای خه‌ندان پارێزراوه‌و پله‌ی‌ عه‌قیدی هه‌یه‌، ماوه‌ی چه‌ند مانگێكه‌ ئه‌و پاڵاوگه‌ بچووكه‌ی‌ بۆ پاڵاوتنی گاز له‌سه‌ر زه‌وییه‌كی شاره‌وانی له‌بازاڕی گازفرۆشانی هه‌ولێر داناوه‌،  بۆ هاتوچۆی رۆژانه‌ش ئۆتۆمبێلی وه‌زاره‌ت به‌كارده‌هێنێت، هه‌رچه‌نده‌ له‌ساڵی رابردووه‌وه‌ بڕیاری داخستنی پاڵاوگه‌ نایاساییه‌كانی ئه‌و ناوچه‌یه‌ دراوه‌.

سه‌رچاوه‌یه‌ك كه‌ له‌نزیكه‌وه‌ ئاگاداری بازاڕی گاز فرۆشه‌كانی هه‌ولێره‌، كه‌پاڵاوگه‌كه‌ی‌ ئه‌و عه‌قیده‌ی‌ لێیه‌ وتی "سه‌ره‌ڕای بڕیاره‌كه‌ی‌ پارێزگاری هه‌ولێر، تاوه‌كو ئێستا پاڵاوگه‌كه‌ی‌ ئه‌و ئه‌فسه‌ره‌ی وه‌زاره‌تی پێشمه‌رگه‌ دانه‌خراوه‌، وه‌كو جاران كارده‌كات".

نایاساییبونی پاڵاوگه‌كان، كه‌ پێشتر زیاتر له‌ 100 پاڵاوگه‌ بوون‌و به‌بڕیاری پارێزگارو له‌لایه‌ن هێزێكی زێره‌ڤانییه‌وه‌ داخران، به‌هۆی ئه‌وه‌یه‌ كه‌ زه‌وییه‌كانیان موڵكی شاره‌وانییه‌، هاوكات ناوچه‌كه‌ شوێنێ پاڵاوگه‌ نین‌و نزیكن له‌هه‌ولێر، به‌هۆیه‌وه‌ كاریگه‌رییان له‌سه‌ر زه‌وییه‌ كشتوكاڵییه‌كان‌و پیسكردنی ژینگه‌ هه‌یه‌، به‌هۆی به‌كارهێنانی ماده‌یه‌كی ژه‌هراوی له‌پاڵاوگه‌كاندا به‌ناوی كۆستیك.


وێنەی پاڵاوگەی ئەفسەرەکەی وەزارەتی پێشمەرگە

ئه‌و عه‌قیده‌ی‌ وه‌زاره‌ت، كه‌ ده‌وامه‌كه‌ی‌ له‌میحوه‌ری باشیك-ه‌و به‌وته‌ی خۆی له‌به‌ره‌ی‌ پێشه‌وه‌یه‌، به‌خه‌ندان-ی وت "ماوه‌یه‌كی كه‌مه‌ له‌و شوێنه‌دا كارده‌كه‌م، هه‌ر بۆیه‌ به‌لیژنه‌كانی هه‌ولێرم وتووه‌ بۆ ماوه‌یه‌كی تر مۆڵه‌تم بده‌نێ دواتر شوێنه‌كه‌ به‌جێده‌هێڵم"، ئه‌وه‌ش له‌كاتێكدایه‌ نه‌به‌ز عه‌بدولحه‌مید، قایمقامی ناوه‌ندی هه‌ولێر ره‌تیكرده‌وه‌ هیچ زانیارییه‌كیان هه‌بێت له‌سه‌ر بوونی مه‌سفایه‌ك له‌و ناوچه‌یه‌.

بڕیاره‌ ئه‌و عه‌قیده‌ی‌ وه‌زاره‌تی پێشمه‌رگه‌ تاوه‌كو 1-8ی ئه‌مساڵ به‌ته‌واوی شوێنه‌كه‌ جێبهێڵێت، ئه‌وه‌ش به‌وته‌ی‌ خۆی.

بازاڕی گازفرۆشان له‌شاری هه‌ولێر، بازاڕی سه‌ره‌كی شاره‌كه‌یه‌ بۆ دانانی نرخی گازو به‌نزین‌و ده‌كه‌وێته‌ سه‌ر رێگای مه‌خمور.

پێشتر ئه‌و پاڵاوگانه‌ نه‌وتی ره‌ش-یان له‌پاڵاوگه‌ نایاساییه‌كانی ده‌وروربه‌ری هه‌ولێر ده‌كڕی‌و دوای پاڵاوتنیان گازیان لێ به‌رهه‌مده‌هێنرا، كه‌ له‌ناو گازفرۆشه‌كان به‌پاڵاوتنی دوو ناسراوه‌.

سه‌رچاوه‌یه‌ك له‌شاره‌وانی شه‌شی هه‌ولێر كه‌ناوچه‌ی‌ گازفرۆشان ده‌كه‌وێته‌ سنوری كاركردنی ئه‌وان، به‌خه‌ندان-ی وت "ئه‌و ناوچه‌ موڵكی شاره‌وانییه‌، بۆیه‌ كاركردن‌و پاڵاوگه‌دانان نایاساییه‌... هه‌رچه‌نده‌ پێشتر پارێزگاری هه‌ولێر بڕیاری لابردنی مه‌سفاكانی ئه‌و شوێنه‌ی داوه‌، به‌ڵام كه‌سێك هێشتا كاری تێداده‌كات".

هاوكات، هێرش حسێن، جێگری قایمقامی پێشوی هه‌ولێر كه‌ماوه‌ی رابردوو به‌وردی ئاگاداری داخستنی ئه‌و پاڵاوگانه‌بوو، جه‌ختی له‌ڕاستی بڕیاری داخستنی ئه‌و پاڵاوگانه‌ كرده‌وه‌ له‌مانگی 11ی ساڵی رابردوو، به‌بڕیاری نه‌وزاد هادی پارێزگاری هه‌ولێر.

جگه‌ له‌نایاسایبوونی پاڵاوگه‌كان‌و به‌كارهێنانی موڵكی شاره‌وانی بۆ ئه‌و مه‌به‌سته‌، به‌پێی چه‌ند وێنه‌یه‌ك كه‌ له‌پێنج كاتی جیاوازدا دراوه‌ به‌خه‌ندان، ئه‌فسه‌ره‌كه‌ی‌ وه‌زاره‌تی پێشمه‌رگه‌ ئۆتۆمبێلێكی ژماره‌  سه‌وزی (4418)ی وه‌زاره‌ته‌كه‌ی‌ بۆ سه‌ر كاره‌كه‌ی‌ به‌كارده‌هێنێت، كه‌ له‌جۆری تۆیۆتا هایلۆكسی ده‌بڵ ئه‌كسڵ ره‌نگ بۆره‌، ئه‌وه‌ش پێچه‌وانه‌ی‌ بڕیاری حكومه‌ته‌ كه‌ نابێت ئۆتۆمبێلی میری بۆ كاری تایبه‌تی به‌كاربهێنرێت.

سه‌رچاوه‌كه‌ی‌ خه‌ندان له‌ناو بازاڕی گازفرۆشانی هه‌ولێر وتی "ئه‌و ئه‌فسه‌ره‌ رۆژانه‌ به‌به‌رچاوی ئێمه‌وه‌ به‌ئۆتۆمبێلی وه‌زاره‌تی پێشمه‌رگه‌وه‌ دێت بۆ سه‌ر كاره‌كه‌ی‌ له‌بازاڕی گازفرۆشان".

به‌گشتی له‌هه‌رێمی كوردستان دیارده‌ی‌ به‌كارهێنانی ئۆتۆمبێل بۆ كاری تایبه‌تی زۆره‌، به‌بێ گوێدان به‌بڕیاره‌كانی حكومه‌ت.

عه‌قیده‌كه‌ی‌ وه‌زاره‌تی پێشمه‌رگه‌ له‌باره‌ی‌ به‌كارهێنانی ئۆتۆمبێلی وه‌زاره‌ته‌وه‌، وتی "توانای كڕینی ئۆتۆمبێلی ترم نییه‌، ته‌نها ئه‌و ئۆتۆمبێله‌م هه‌یه‌و پێی ده‌چمه‌ سه‌ركاره‌كان له‌بازاڕی گازفرۆشان، یان پێیده‌چم بۆ میحوه‌ر له‌باشیك، خۆ گاز به‌پیكاب ناگوزارێته‌وه‌ به‌ڵكو به‌تانكه‌ر گازه‌كه‌ ده‌گوازمه‌وه‌".


وێنەی ئۆتۆمبێلەکەی وەزارەتی پێشمەرگە لەبەردەم پاڵاوگەکەدا لە هەولێر

ئه‌وه‌ش له‌كاتێكدایه‌ كاركردن له‌پاڵاوگه‌و دۆسییه‌ی‌ نه‌وت له‌هه‌رێمی كوردستان داهات‌و قازانجی باشی هه‌یه‌.

جه‌بار یاوه‌ر، ئه‌مینداری گشتی وه‌زاره‌تی پێشمه‌رگه‌، به‌خه‌ندان-ی وت "سوپاستان ده‌كه‌ین كه‌پێمان بڵێن ئه‌و كه‌سانه‌ كێن ئۆتۆمبێلی وه‌زاره‌ت به‌كارده‌هێنن بۆ كاری تایبه‌ت، تاوه‌كو به‌دواداچونی بۆ بكه‌ین، چونكه‌ له‌پێشتردا به‌بڕیاری حكومه‌تی هه‌رێمی به‌كارهێنانی ئۆتۆمبێلی تایبه‌ت قه‌ده‌غه‌كراوه‌".

وتیشی كه‌ دوابه‌دوای بینینی زانیارییه‌كانی نێو راپۆرته‌كه‌ی خه‌ندان "ئیجرائاتی پێویست ده‌كه‌ین".

مانه‌وه‌ی‌ پاڵاوگه‌كه‌ی‌ ئه‌و ئه‌فسه‌ره‌ له‌ناوچه‌ی‌ گازفرۆشانی هه‌ولێر، له‌كاتێكدایه‌، نه‌به‌ز عه‌بدولحه‌مید، قایمقامی ناوه‌ندی هه‌ولێر به‌خه‌ندان-ی  وت "هه‌ر شوێنێك نایاسایی بێت‌و رێگه‌پێدراو نه‌بێت، یان له‌سه‌ر موڵكی حكومه‌ت دروستكرابێت، ئه‌وا به‌دڵنیایی به‌دواداچوونی بۆ ده‌كه‌ین‌و دایده‌خه‌ین، زۆر باشیشتان كرد كه‌ئاگادارتان كردینه‌وه‌".



ئه‌م بابه‌ته 10077 جار خوێنراوه‌ته‌وه‌‌


                  
                  

زۆرترین خوێندراو


Copyright © 2016 Xendan.org all rights reserved
Design by AVESTA GROUP , programming and database by KURDSKY.COM