پیشەی میدیاكاری وەرزشی كوردی چییە؟


بەراستی وبەبێ پەردە، زۆر بە توندی و بێ چاوپۆشین لەكەس وتەنانەت لەخۆشم و من بەراشكاوی دەڵێم لە وڵاتی من پیشەی میدیاكاری وەرزشی چییە؟ تەنها دیمانەی بێ موناسەبە و ریال لە بەرشەی بردەوە؟ پاڵەوانی چالاكی فەیس بووك و ناسینی بەرپرسە وەرزشییەكان بۆ كاری پێویست؟ كۆپی كردنی هەواڵی بیانی ودانانی بەناویخۆت كە واهەست بكەین تۆ لە هیچ سەرچاوەیەكت وەرنەگرتووە،كەچی لە كوردستان سەرچاوەی میدیای وەرزشی بڕوا پێكراومان نیە!

یاخود دانیشتنی شەوانی گازینۆكانی بێكاری؟ یان خۆپێ شۆڕكردنەوە و پێوەلكاندن بە پۆستی میدیای وەرزشی كە لێشی نازانێ!،یان زل كردن و مانشێتی بریقەدار بۆ خولەكانی كوردستان،یان میدیاكاری كرێ گرتەكە ئیش وكاری نیە بە ئارەزوو وبێ زانیاری و بێ ویژدانانە هێرش دەكاتە سەر یەكێتییەكی وەرزشی یان كەسایەتیەكی وەرزشی ،لەهەمان كاتدا بە قسەی زل و قەڵەو وەكو پارووە چەورەكانی كە وەریگرتووە یەكێتییەكی وەرزشی لەگەڵ بە پرسەكەی لێمان دەكات بە تەیارە، وا هەست دەكات كە ئەم برادەرە مۆندیال و ملوانەكەی ئۆلۆمپیادی بۆ كورد هێناوەتەوە! پیشەی میدیاكاری وەرزشی كوردی دەبێت ئەمانە بێت؟ یان ئێمە نایزانین؟

ئەگەر ئەمە پیشەكەمان بێت،من كاری سەختی كرێكاریم زۆر پێ باشتر وسەرفرازترە،چونكە نانی عارەقی نێو چەوان باشترە لە عارەقی شەرمەزاری! كەواتە چۆن دەبێت خۆمان وپیشەكەمان كە میدیای وەرزشییە بپارێزین و بەرگری لە مافەكانمان بكەین،هەروەها ئەوەی مەبەستمە لەو نووسینە كە ئێمەی كورد لە هەموو جومگەكانی ژیان یەك تەوەر و پرس لای ئێمە زۆر لاواز و كزە، ئەویش هەست كردن بە ئاسایشی نەتەوەیی،بێگومان ئەمەش پێویستی بە ئینتمایی نیشتیمانی هەیە.

ماوەی چەند رۆژێكە هەواڵ لەسەر راهێنەری تۆپی پێی سوری ئوسامە عەبدولموحسین و كوڕەكەیەتی،كە یانەی ریال مەدرید پێشوازی لێكردوون،ئەو راهێنەرە عەربە شۆڤینیە یەكێك بووە لەو بەعسییە دڕندانەی چەندین رۆڵەی كورد بەدەستی ئەو چەپەڵە لەناو چووە، كەچی ئەمجارەش میدیاكارانی وەرزشی كوردی بە هەواڵێك یان بە راپۆرتێك یان بە لێدوانێك ئیدانەی ئەو عەرەبە شۆڤینییەیان نەكرد!، بە راستی سەیرە، كوا ئینتیمای نیشتیمانی؟ كوا بەرگری كردن لە نەتەوە و خاكی وڵات؟

كوا بوێری و هەست كردن بە بەرپرسیارەتی نیشتیمان؟ میدیاكارانی وەرزشی كوردستان پێویستە،بەڵكو دەبێت هەموومان ئیدانەی ئەو كارەبكەین و هەموومان كۆبینەوە نامەیەكی ناڕەزایی ئاراستەی وڵاتی ئیسپانیا بكەین كە ئەو راهێنەرەی ئەوان مافی پەنابەریەتییان پێداوە،ئەوە مرۆڤـ كوژ و دڕندە و شۆڤینی و بێ ویژدان و بەعسی و كۆنە پەرستە، ئەو لەبری راهێنەری وگیانی وەرزشی،خوێن مژ و گیانی شەڕان گوێزی هەیە،بۆیە میدیاكارانی وەرزشی كوردی لەخەو هەڵسن!.

نیشانە کردن

زۆرترین خوێندراو