كێشه‌ ڕۆناڵدۆ نیه‌

هه‌وراز كاوه‌

ناتوانین ده‌ستی تۆمه‌ت بۆ ڕاهێنه‌ری پرتوگال (فرناندۆ سانتۆس) درێژ بكه‌ین و پێمان وابێت ئه‌و به‌شێكی گه‌وره‌یه‌ له‌ شكسته‌كانی ئه‌م دوو یارییه‌ی به‌ڕازیلی ئه‌وروپا، كه‌ له‌ كاتێكدا ئه‌و ڕاهێنه‌ره‌ له‌ یارییه‌كانی پاڵاوتن ئه‌نجامی باشی هه‌بووه‌. تاوانباركردنی ئه‌ستێره‌ی یه‌كه‌می تیپه‌كه‌یش (كریستیانۆ ڕۆناڵدۆ)، له‌ ڕاستیدا كارێكی ژیرانه‌ نیه‌، به‌ڵكو تیپه‌كه‌ هه‌موو وه‌ك یه‌ك تێدا به‌رپرسیارن، له‌ كاتێكدا هه‌ڵبژارده‌ی پرتوگال خاوه‌نی چه‌ند یاریزانی به‌ ئه‌زموونی نموونه‌ی (پیی و نانی و كوارێزما و مۆتینهۆ)یه‌، كه‌ ئه‌مانه‌ش چه‌ندین یاریزانی لاو هاوڕێتیان ده‌كه‌ن وه‌كو: (ئه‌ندریا گومیش و جواو ماریۆ و جیریریۆ). له‌ سه‌رو ئه‌مانه‌یشه‌وه‌ (ڕۆناڵدۆ)، له‌ هێڵی پێشه‌وه‌ بووه‌ به‌ كۆكه‌ره‌وه‌ی تیپه‌كه‌.

له‌ یارییه‌كه‌ی به‌رامبه‌ر (نه‌مسا) تیپی (پرتوگال)، له‌ 60% ده‌ستیان به‌سه‌ر ڕووبه‌ری یاریگادا گرتبوو، هه‌روه‌ها زۆر كات به‌ نه‌خشه‌ی (4،3،3) یاریانده‌كرد، كه‌ ته‌نیا یاریزانێك وه‌كو به‌رده‌می به‌رگری ده‌بینرا (كارڤالیۆ)بوو. هه‌ردوو یاریزان (گۆمێز و مۆتینۆ) له‌ لای ڕاست و چه‌پ یاریان ده‌كرد، هه‌روه‌ها سێ‌ یاریزانی پێشه‌وه‌ بریتین، له‌ (ڕۆناڵدۆ و كوارێشما و نانی)، كه‌ توانایه‌كی باشی هه‌ڵمه‌ت بردنیان هه‌یه‌.

سانتۆس، پشتی به‌وه‌ ده‌به‌ست یاری بۆ تیپه‌كه‌ی بكاته‌وه‌، به‌ تایبه‌تی له‌ ناوچه‌ی سزای تیپی دژ، كه‌ زۆركات هه‌وڵیدادا به‌رگری (نه‌مسا) بێنێته‌ ده‌ره‌وه‌ی ناوچه‌ی (box) تا بتوانن به‌ لێدانی تۆپی توندو بچڕاندانی یاری گۆڵ تۆمار بكه‌ن، هه‌روه‌ها (گۆمێش) یاریزانی ته‌كنیكی یارییه‌كه‌بوو، كاتێك یاریزانه‌كانی به‌رده‌می هه‌ڵبژارده‌ی (نه‌مسا)ی ناچار ده‌كرد ناوچه‌ی یاریكردنی خۆیان ته‌رك بكه‌ن، كه‌ ئه‌وه‌ش ناوچه‌یه‌كی به‌رفروانی بۆ لێدانی شووت، بۆ هه‌ردوو یاریزان (ڕۆناڵدۆ و نانی) ده‌كرده‌وه‌. هه‌ڵبژارده‌ی (پرتوگال) (23) تۆپیان ئاڕاسته‌ی گۆڵكرد، به‌ڵام به‌هۆی نه‌بوونی هه‌ماهه‌نگی و هاوكاری و وردبین نه‌بوون و، له‌ ده‌ستدانی ته‌ركیز، هیچ گۆڵێكیان نه‌كرد، هه‌روه‌ها (ڕۆناڵدۆ)، له‌م پاڵه‌وانێتییه‌دا (20) تۆپی ئاڕاسته‌ی گۆڵ كردووه‌، كه‌چی هه‌ژماره‌كه‌ی (2).

هه‌موو ده‌ڵێن: ڕۆناڵدۆ، هێزی تێكشانی به‌رامبه‌ری نه‌ماوه‌، تا توانای به‌سه‌ر دژبه‌ره‌كانیدا بشكێت، هیچ توپێكی هۆشیارانه‌ به‌كار ناهێنێت، ئه‌وه‌ جگه‌ له‌وه‌ی تیپه‌كه‌ هیچ هێرشكارێكی نیشان شكێن، یاخود (ئه‌نگاوته‌)ی نیه‌، به‌ تایبه‌تی له‌ ده‌ره‌وه‌ی ناوچه‌ی سزا، یان بتوانن بیگۆرن، بۆ گۆڵ تۆمار كردن، ئه‌وه‌ جگه‌ له‌وه‌ی (كریس) ناتوانێت هیچ خوێندنه‌وه‌یه‌ك بۆ یاریزانانی تیپه‌كه‌ی بكات، به‌ پیچه‌وانه‌ی یانه‌ی (ڕیاڵ مه‌درید)، كاتێك هه‌ردوو یاریزان (بنزیما و بێڵ) سوودێكی بێ‌ پایان ده‌به‌خشنه‌ ئه‌و یاریزانه‌و سوودی زۆر له‌ جوڵه‌كانی (بنزیما) و هێَزی (بێڵ) وه‌رده‌گرێت.

له‌ ڕاستیدا (پرتوگال) كێشه‌ی یاریزانی فه‌ردی هه‌یه‌، كه‌ ئه‌وه‌ش به‌ڕوونی له‌ هێڵی هێرشبردندا ڕه‌نگدانه‌وه‌ی به‌رچاوی هه‌یه‌. بۆ نموونه‌: ته‌ماشای هه‌ردوو یاریزان (سانتۆس و كورێشما) بكه‌ن، زۆربه‌ی كات له‌ لاكانه‌وه‌ ده‌رده‌كه‌ون و بگره‌ جار جاریش جێگاكانیان ده‌گۆڕنه‌وه‌، هه‌روه‌ها ئه‌مه‌ش له‌ ناوه‌وه‌ بۆ (ڕۆناڵدۆ و نانی) ڕاسته‌، كه‌چی هیچ هاوكاریه‌ك له‌ نێوان بنكه‌كانی یاری ئه‌و تیپه‌دا نیه‌، چونكه‌ هه‌موو یاریزانه‌كان هێنده‌ی ده‌یانه‌وێت ڕۆڵی خۆیان به‌رچاو بخه‌ن، نیو ئه‌وه‌نده‌ نایانه‌وێت یاری به‌ كۆمه‌ڵ دروست بكه‌ن، ته‌ماشاكه‌ن، هه‌ر كات تۆپ لای هه‌ر یاریزانێكی (پرتوگالی) بێت، یه‌كه‌م بیركردنه‌وه‌ی ته‌نیا لێدانه‌ له‌ تۆپه‌كه‌، له‌ هه‌ر شوێنێكی یاریگاكه‌دا بێت، كه‌ ئه‌وه‌ش كێشه‌ی سه‌ره‌كی بۆ یاریزانه‌كانی پێشه‌وه‌ دروستكردووه‌، كه‌ كه‌مترین تۆپیان پێده‌گات.

نیشانە کردن

زۆرترین خوێندراو